सर्वात्मका शिवसुंदरा
सर्वात्मका शिवसुंदरा, स्वीकार या अभिवादना ।
तिमिरातूनी तेजाकडे प्रभू, आमुच्या ने जीवना ॥धृ ॥
सुमनात तू, गगनात तू, ताऱ्यांमध्ये फुलतोस तू,
सद्धर्म जे जगतामध्ये, सर्वांत त्या वसतोस तू,
चोहीकडे रूपे तुझी, जाणीव ही माझ्या मना तिमिरातूनी ॥ १ ॥
श्रमतोस तू शेतांमध्ये, तू राबसी श्रमिकांसवे,
जे रंजले वा गांजले, पुसतोस त्यांची आसवे,
स्वार्थाविना सेवा जिथे, तिथे तुझे पद पावना तिमिरातूनी ॥ २ ॥
न्यायार्थ जे लढती रणी, तलवार तू त्यांच्या करी,
ध्येयार्थ जे तमि चालती, तू दीप त्यांच्या अंतरी,
ज्ञानार्थ जे तपती मुनी, होतोस त्यांची साधना तिमिरातूनी ॥ ३ ॥
करुणाकरा करुणा तुझी, असता मला भय कोठले ?
मार्गावरी पुढती सदा, पाहीन मी तव पाऊले ।
सृनत्व या हृदयामध्ये, नित जागवी भीति विना ॥४॥
कुसुमाग्रज
पोस्ट्स
कोणत्याही टिप्पण्या नाहीत:
टिप्पणी पोस्ट करा